O Clúster TIC Galicia patrocinará o AI Song Contest, coñecido como a "Eurovisión" mundial da  intelixencia artificial, que celebrará a súa edición 2023 na cidade da Coruña o vindeiro 4 de novembro.  A edición deste ano, que tamén contará co apoio da Xunta de Galicia, a través de Turismo de Galicia, e o Centro de  Supercomputación de Galicia, leva por lema "Walking With AI" (O Camiño  da IA), e celebra a diversidade de xeitos de traballar a intelixencia artificial na música no eido  internacional, cos artistas no centro do proceso de composición. 

Esta cuarta edición contará cunha cerimonia de inauguración, que terá lugar o venres 3 de  novembro á noite, antes do grande día, no CSA da Cidade das TIC, o mesmo recinto que acollerá  o congreso "AI & Creation Day" durante a mañá e tarde do sábado, cunha programación de  charlas e mesas de debate académicas arredor da música xerada con intelixencia artificial e sobre  os dereitos de propiedade intelectual.  

Expertos na materia tamén achegarán luz sobre as estratexias creativas empregadas polos  equipos finalistas, proporcionando información sobre os procesos innovadores que hai detrás das  súas composicións xeradas por IA. Ademais, o público presencial e en liña terán a oportunidade  de descubrir como se está a traballar en Galicia a intelixencia artificial e, especialmente, como se  aproveita a IA para preservar e contribuír á lingua galega. 

Despois da xornada divulgativa, os asistentes gozarán da espectacular Grande Final en Studio  Follow, ubicado na Grela, cun programa de televisión en directo para celebrar a música co-creada  entre individuos e máquinas, e onde a cultura galega estará moi presente. Rematarase cunha  festa posterior no mesmo estudio. A primeira serie de entradas porase á venda a partir deste  venres 7 de xullo ás 12:00 horas a través da plataforma Ticket Hoy. 

Con este certame, A Coruña convértese na capital mundial da música escrita con intelixencia  artificial, aproveitando a acollida da futura AESIA. Así, a organización tamén recoñece o título de  anfitrión do equipo PAMP!, subcampión o ano pasado con "AI-Lalelo" e gañador da residencia  artística do concurso en Sony CSL París, polo que terá a oportunidade de volver representar a  Galicia, clasificada directamente á final. 

Aberto o prazo de candidaturas 

Ata o 4 de setembro, convídase a artistas, afeccionados da intelixencia artificial e  outros perfís vencellados á innovación cultural de todo o mundo a presentar a súa composición  co-creada con IA. Deste xeito, os organizadores agardan recibir composicións musicais de todos  os xéneros, desenvoltas por equipos compostos por músicos, técnicos e enxeñeiros con axuda da  intelixencia artificial.

O público e un xurado de profesionais da IA e da industria musical xulgarán non só a calidade das  cancións, tamén a calidade e a innovación na interacción entre artistas e algoritmos. A  competición deste ano tamén fai fincapé na responsabilidade dos creadores e a transparencia no  uso da intelixencia artificial, polo que premiará os grupos que poidan demostrar principios éticos  sólidos con respecto aos datos de adestramento e participación dos artistas. 

Todos os detalles e actualizacións sobre o evento poden revisarse na páxina web oficial do AI  Song Contest (www.aisongcontest.com) e nas redes sociais (@aisongcontest). 

Sobre o AI Song Contest 

AI Song Contest é un concurso internacional que mostra o potencial creativo da música xerada  por IA. Está organizado por AI Song Contest Foundation. Dende a súa creación en 2020, AI Song  Contest está na vangarda da IA e a música, fomentando a innovación e promovendo o diálogo  entre artistas, científicos e o público. Os gañadores do ano pasado recibiron premios en metálico e  a oportunidade dunha residencia artística dunha semana en Sony CSL París. 

O evento, producido por Follow, conta co apoio de Afundación, Cidade das TIC, Amsterdam Music Lab, Infinite Album, DIHGIGAL,  Balidea, Data Spartan e AGASOL. Ten o soporte do CITIUS, CITIC, Consello da Cultura Galega,  AIHUB CSIC, Goldsmiths University of London, OdiseIA e Microsoft. Artificia, Parque Empresarial  da Grela e Confederación de Empresarios da Coruña promocionan e Nós Televisión, Quincemil,  Código Cero e GCiencia son medios colaboradores.