Quobis impulsará Cardi@ngel, do enxeñeiro  compostelán Jesús Velasco, que busca conectar persoas con problemas cardíacos e  voluntariado en RCP 

Cinfo promoverá Zenss, unha solución para axudar  a persoas con problemas de saúde mental, da emprendedora coruñesa Astrid  Rincone

Son as propostas seleccionadas das once que se  presentaron á iniciativa da entidade para formalizar alianzas entre ideas de  negocio e líderes tecnolóxicos 

O Clúster TIC Galicia desenvolverá dúas aplicacións de saúde e benestar, no marco do seu programa Tech Angels Network, a través da alianza estratéxica entre Quobis e o proxecto Cardi@ngel, do enxeñeiro compostelán Jesús Velasco, e entre a tecnolóxica Cinfo e Zenss, unha iniciativa da emprendedora coruñesa Astrid Rincones.

Cardi@ngel e Zenss son dúas das once ideas de negocio que se presentaron a Tech Angels Network, acadando o apoio das empresas socias da entidade Quobis e Cinfo, que actuarán como Tech Angels destes produtos, dende o proceso de deseño ata o seu lanzamento, previsto para o vindeiro ano.

Cardi@ngel é unha app de alerta inmediata, colaborativa e gratuíta, dirixida a usuarios con enfermidades do corazón e a voluntarios que saiban realizar reanimación cardiopulmonar (RCP). “Cun só clic na pantalla do móbil por parte da persoa que está a sufrir o infarto ou ataque cardíaco, os voluntarios próximos á súa localización recibirían un aviso para poder practicarlle a RCP o máis rápido posible”, sinala Jesús Velasco, promotor de Cardi@ngel e CTO da empresa homónima.

Con carácter paralelo, a aplicación enviaría unha notificación ao servizo de emerxencias. “A idea xurdiu a raíz da morte dun amigo. Sufriu un infarto e faleceu como consecuencia de non recibir a asistencia adecuada no momento preciso”, confesa.

En España, unha de cada tres persoas morre por unha enfermidade cardiovascular, sendo a segunda causa de morte no noso país, con 114.865 falecementos só en 2023, e a primeira causa a nivel mundial, con 17,9 millóns ao ano. Cardi@ngel pretende paliar estes datos ofrecendo unha solución que xa conta co aval da Sociedade Española de Cardioloxía e a Fundación Española do Corazón.

O apoio de Quobis chega nun momento clave para a empresa. “Que unha compañía líder no suministro de solucións de comunicacións desenvolva o software de Cardi@angel axiliza moito o proceso de lanzamento do produto, xa que está baseado precisamente en comunicacións áxiles e fiables”, apunta Velasco.

Unha gran oportunidade 

Cinfo, pola súa banda, chegou a un acordo coa emprendedora coruñesa Astrid Rincones, impulsora de Zenss, unha solución para acompañar a persoas con problemas de saúde mental. “A través do programa de preincubación Santander X Explorer transformei a proposta nun proxecto sostible e foi aquí onde me recomendaron presentalo a Tech Angels”, comenta Rincones, e engade: “Que Cinfo confiase na miña proposta paréceme unha gran oportunidade porque esta solución vai axudar a moita xente”.

A aplicación está pensada para servir de apoio a gabinetes e clínicas psicolóxicas, terapeutas ou psiquiatras, para que poidan realizar un seguimento máis preciso dos seus pacientes e afinar os diagnósticos. A través dun deseño atractivo, funcional e amigable, o usuario pode utilizar a aplicación coma un diario psicoemocional no que indicar o seu estado anímico ou utilizar a gravadora de voz para rexistrar as cuestións que máis lle preocupan.

“Cos datos recopilados, realízase un seguimento do paciente, xéranse estatísticas para coñecer o seu historial mental, e a través da intelixencia artificial, pódense detectar termos que xeren alertas para previr certas condutas, por exemplo, pensamentos suicidas”, precisa Astrid.

Tech Angels Capital

Outra das iniciativas que contempla o programa Tech Angels do Clúster TIC Galicia é o evento Tech Angels Capital, que se celebrará o 28 e 29 de outubro nas instalacións da Zona Franca de Vigo, en colaboración coa Amtega, o propio Consorcio, o Igape e NodeHub.

Este encontro está dirixido a startups que buscan implementar solucións tecnolóxicas innovadoras e a inversores interesados en impulsar o crecemento destas compañías. Para poder participar no evento, as empresas emerxentes teñen que enviar a súa solicitude antes do 30 de setembro a través deste formulario.

Máis información sobre o programa.