A idea de CertyChain, o proxecto que recibiu o primeiro premio do programa de incubación Node Hub, promovido por Incibe Emprende e o Clúster TIC Galicia, xurdiu da experiencia dun amigo: "Modificaron o seu contrato de traballo despois de que o asinase en papel", sinala Sara Chao, CEO da empresa. Este foi o punto de partida para que catro amigos, estudantes de Enxeñería Informática, puxésense ao choio.

"Estivemos a investigar que solucións existían no mercado e que tecnoloxías ou melloras podiamos achegar nós", comenta Sara Chao. Así xurdiu CertyChain, unha firma dixital, baseada na tecnoloxía blockchain, que busca resolver dúas cuestións que se dan actualmente: a posibilidade de falsificar unha firma e o risco de suplantación de identidade.

"O primeiro problema solucionámolo co desenvolvemento dun algoritmo que permite ao usuario subir un documento asinado dixitalmente a través da aplicación e comprobar se o contido foi alterado", explica Chao. O segundo, resolvérono integrando un KYC, unha tecnoloxía que utilizan os bancos cando se crean contas en liña a través do móbil para comprobar que se trata dunha persoa física e que os datos achegados son reais.

Enfocar a validación do produto

Node Hub permitiulles enfocar a validación do produto e o contacto con posibles clientes, ademais de sintetizar o PMV para que realmente sexa un produto mínimo viable. "Decidimos participar no programa porque nos parecía unha gran oportunidade para facer crecer e evolucionar o proxecto, pero tamén para nós como profesionais", confesa Sara Chao.

Tras cinco meses de mentorías e diversas experiencias que lles permitiron definir a súa proposta, facer networking e organizar diferentes necesidades, no Demo Day, CertyChain recibiu o primeiro premio ao mellor proxecto da aceleradora. "É a recompensa a todo o traballo e esforzo que levamos feito ao longo do programa, pero tamén é un indicativo de que imos polo camiño correcto e de que seguimos avanzando", sostén.

Actualmente están a desenvolver o PMV de CertyChain e os seus próximos pasos céntranse en captar os primeiros clientes, asesorías e axencias inmobiliarias preferentemente, en buscar financiamento e lograr a maior difusión posible do proxecto. O obxectivo é que CertyChain salga ao mercado en 2025, crear unha empresa coa que comercializar o produto e, posteriormente, ofrecelo como unha API que as compañías poidan incluír dentro do seu software de xestión.