O Clúster TIC Galicia, en colaboración co Clúster da Madeira e o Deseño de Galicia (CMD), organiza a sesión informativa “Intelixencia Artificial aplicada á empresa”, unha xornada para abordar como dar soporte á oficina técnica de prototipos e elaboración de planos de fabricación neste sector. 

Na sesión, que terá lugar o mércores 5 de marzo no Biopolo A Sionlla de Santiago de Compostela, expoñerase tamén como a integración da IA nos negocios permite un feedback activo mediante a análise en tempo real de recensións e comentarios, identificando oportunidades de mellora en produtos e servizos mentres se reforza a relación cos clientes. 

Ademais, explicarase como analizar os datos de clientes para crear campañas personalizadas, o que asegura que cada mensaxe sexa relevante, aumentando a taxa de conversión e reducindo os custos de márketing. Finalmente, tratarase como a xestión dinámica de inventarios con ferramentas de IA mantén niveis óptimos de stock en todas as fases da cadea, minimizando os custos asociados a excedentes ou escaseza de produtos. Para participar no evento é preciso inscribirse aquí.

Axenda 

• 10:00 h. "Estratexia do Clúster da Madeira e o Deseño de Galicia en relación á IA". Ricardo González, xerente do CMD.

• 10:15 h. "Que é a IA Xen". Javier Martínez, Possible Incorporated.
• 10:30 h. "Caso de uso. Aplicación da IA nunha empresa do sector da madeira". Gregorio González, FINSA.
• 11:00 h. Café-Networking
• 11:30 h. "Posibles proxectos de implementación da IA no sector da madeira". Representantes das seguintes empresas: Catro Dixital, Plexus, Merlin Software. Enxenio SL, Tesla e Cinfo.
• 12:30 h. "Oportunidades de financiamento". Andrés Xastre, director de proxectos do Clúster TIC Galicia.
• 12:45 h. Conclusións e próximos pasos.
• 13:00 h. Fin da Xornada.

Colaboración entre asociacións

O Clúster TIC Galicia iniciou xa un grupo de traballo con outras asociacións empresariais, como Clúster Téxtil e o Clúster da Construción, -recén declarados como estratéxicos polo Consello da Xunta de Galicia-, para axudarlles a implementar ferramentas IA nos seus procesos.