O 13 de febreiro finaliza o prazo para que as compañías aspirantes presenten a súa candidatura

O asesoramento na redacción do documento conta cun orzamento de licitación de 45.980 euros 

O Clúster TIC Galicia vén de publicar o prego de condicións para a contratación dun servizo de consultoría que apoie á entidade na recollida de información, redacción e aprobación do Plan director do sector TIC de Galicia. Este paso chega despois de que o presidente da entidade, Antonio Rodríguez del Corral, e a conselleira de Economía e Industria, María Jesús Lorenzana, asinaran un convenio de colaboración para avanzar na elaboración do Plan director da industria das TIC, o pasado 30 de xaneiro.

O prazo de presentación de propostas remata o xoves 13 de febreiro de 2025 e o orzamento de licitación para a contratación deste servizo é de 45.980 euros. As tarefas que se buscan contratar son:

• Elaborar o plan director da industria das TIC, en galego e castelán, e acompañar á entidade nos trámites e incorporando as modificacións que poidar xurdir ata a súa aprobación no Consello da Xunta.
• Investigación de instrumentos financeiros públicos, presentes e futuros, que apoien a implementación das medidas recollidas no plan director.

Estes dous lotes poderán adxudicarse xuntos ou por separado a un ou máis licitantes, de modo que se poderán presentar ofertas que non abarquen ambos traballos. A licitación adxudicarase por un procedemento aberto, onde calquera empresa, sexa socia, excepto os membros do Comité de Dirección, ou non, que conte coa solvencia requirida, poderá presentar a súa oferta. 

As propostas presentaranse obrigatoriamente a través de correo electrónico, na dirección: info@clusterticgalicia.com. En caso de que os arquivos teñan un tamaño que impida a súa transmisión por correo electrónico, poderase subir á nube e facilitar un enlace para a súa descarga. 

Para a adxudicación valoraranse criterios como a calidade da solución proposta e metodoloxía de traballo, melloras ou servizos adicionais, experiencia e cualificación do equipo de traballo adscrito ao proxecto ou experiencia en traballos similiares. Así mesmo, nos pregos do concurso, establécense outras cuestións que se terán en conta con carácter positivo, como o feito de ser socio do Clúster TIC Galicia, a reducción do prazo de entrega ou a proposta económica.

Fortalecer o sector

As medidas incluídas no plan están dirixidas a fortalecer o sector tecnolóxico industrial, mellorando a competitividade, fomentando a internacionalización, favorecendo a sustentabilidade e impulsando a innovación dos procesos produtivos das empresas TIC, coa finalidade de incrementar o emprego de calidade en Galicia. Igualmente, este plan pretende estimular a captación de investimento no sector que supoña un reforzo do tecido industrial de Galicia, reforzando as sinerxías sectoriais e/ou intersectoriais.

En consecuencia, o Clúster TIC Galicia asume un compromiso cos principios de publicidade, concorrencia, transparencia, confidencialidade, igualdade e non discriminación, garantindo que os contratos se celebren coas empresas que presenten mellores propostas. 

Consulta o prego completo de condicións aquí.