Segundo os datos lanzados polo BBG-TIC(Barómetro da Brecha de Xénero nos estudos TIC) – unha ferramenta web gratuíta(wib.aldaba.es/bbg-tic), desenvolta pola Cátedra ALDABA-WIB, que incorpora os novos datos de matriculación, resultados académicos, etc. do Grao de Enxeñería Informática na Coruña e Ourense - o número de mulleres que cursan estudos relacionados coa tecnoloxía está a aumentar, aínda que este Grao continúa sendo un dos que rexistran unha menor matriculación de mulleres.

A Cátedra Interuniversitaria ALDABA-WIB (Women, ICT & Business), na que participan a Universidade de Vigo (UVigo), a Universidade da Coruña (UDC) e a consultoraTIC ALDABA, constituíuse para contribuír a paliar esta situación, unindo forzas con ambas as universidades para poñer en marcha iniciativas que eliminen os estereotipos de xénero asociados ás profesións TIC e visibilicen referentes femininos neste campo.

Unha destas accións é o ALDABA-TIC Camp: un campamento tecnolóxico de verán dirixido a nenas e nenos de entre 6 e 12 anos, que se desenvolve simultaneamente na Coruña e Ourense e no que o 80% das prazas están reservadas para elas. A razón subxacente é que as nenas poidan percibirse como maioría e o naturalicen como unha situación que pode darse na realidade, en contraposición ao que acontece nas aulas das escolas onde se imparte o Grao de Enxeñería Informática.

Durante o Camp, as nenas e nenos participantes aprenden, xogando, sobre adestramento con drons, creación de ferramentas en 3D, construción e programación de robots etc. Todo iso ambientado nunha misión ás profundidades do mundo submarino. O Camp está parcialmente subvencionado polos Consellos Sociais da UDC e de laUVIGO, o que supón un impulso para que calquera familia, independentemente da súa renda, poida beneficiarse.

O campamento estival, que se está desenvolvendo durante a semana do 25 ao 28 de xuño, está a ser un completo éxito, tanto en número de solicitantes como na avaliación que fan do mesmo tanto nais e pais, como nenas e nenos asistentes. É por iso que este ano terá lugar unha segunda quenda na Coruña, do 1 ao 5 de xullo, para atender a alta demanda recibida.

O venres 28 de xuño, ás 12:30 horas, na aula de Graos da Facultade de Informática deA Coruña e na aula de Graos da Escola Superior de Enxeñaría Informática de Ourense, terán lugar senllos actos de clausura do ALDABA-TIC Camp: Misión a en lasProfundidades e a entrega de diplomas ás e os participantes.

Nos actos participarán, na Coruña, a Directora da Cátedra pola UDC, Virginia Mato, e o Conselleiro de ALDABA, Enrique Fernández; e en Ourense, a Directora da área de Igualdade da UVigo, Águeda Gómez; o Director da ESEI, Arno Formella; e a Directora da Cátedra pola UVigo, Alma Mª Gómez.