A guerra en Ucraína cumpre hoxe 110 días e cóntanse por centenares as persoas ucraínas que solicitaron e concedéuselles protección en Galicia. As súas necesidades son innumerables, desde as máis básicas, de alimentación e refuxio, ata outras que pasan por escolarización, posibilidades de traballo ou medios de comunicación. Desde a Asociación Galega de Axuda a Ucraína ( AGA- UCRAÍNA) tratan de coordinar todos os esforzos para que os cidadáns ucraínos que buscan refuxio en Galicia conten con todos os recursos necesarios para manter unha vida digna.

ALDABA, unha empresa que centra os seus esforzos de RSC en Galicia, únese a este impulso para paliar as necesidades da poboación ucraína a través da doazón de 11 equipamentos informáticos. “A iniciativa xurdiu a través dunha proposta dos profesores da Universidade da Coruña Virginia Mato – directora da Cátedra ALDABA- WIB ( Women, ICT & Business) – e Miguel González, pensando na necesidade de colaborar coas persoas refuxiadas que actualmente viven en Galicia. Para elas, contar con equipos informáticos é imprescindible á hora de comunicarse, tanto con familiares e amizades, como coas propias organizacións de axuda, así como para xestionar trámites administrativos ou posibilitar, como neste caso, a asistencia a clases en liña. Pareceunos unha maneira efectiva e práctica de axudar desde ALDABA”, indica Enrique Fernández, director de ALDABA.

“Estamos encantados coa colaboración de ALDABA, pois será moi útil aos estudantes ucraínos que non teñen equipos informáticos e agradecemos moito a súa doazón”, sinala Natalia Afónina, presidenta de AGA- UCRAÍNA.

Asociación Galega de Axuda a Ucraína ( AGA- UCRAÍNA)

AGA- UCRAÍNA é unha asociación constituída en febreiro de 2022 grazas á vontade e iniciativa de emigrantes ucraínos con residencia en Galicia, xunto aos seus familiares e amigos, afectados, todos eles, polo conflito en Ucraína. Poñendo o foco nos civís que escapan da guerra, a asociación trata de dar resposta inmediata ás necesidades da poboación desprazada, desde a acollida dos refuxiados en Galicia, ata a asesoría sobre protección internacional.

Ademais, desde os seus inicios, a asociación mobilizouse para conseguir o envío de bens de primeira necesidade ás persoas que se atopan en primeira liña do conflito.

ALDABA

ALDABA é unha prestixiosa compañía do sector da Consultoría TIC, que deseña, desenvolve e implanta solucións do mundo da informática e as comunicacións.

Para ALDABA, a actividade empresarial non é allea á realidade social, polo que a Responsabilidade Social Corporativa, ou RSC, intégrase na súa cultura a través da conciencia activa. Temas como a privacidade da información, o equilibrio entre vida persoal e traballo, ou a pervivencia de políticas ou costumes discriminatorias (por razón de sexo, raza ou relixión) son temas que preocupan a esta empresa, e testemuñan que o económico non pode permanecer afastado do social.

Un dos enfoques do seu RSC céntrase en respectar rigorosamente os dereitos de clientes e provedores, respectar os Dereitos Humanos, e apoiar a grupos de risco.

Para ALDABA resulta de vital importancia ser unha empresa diversa e, para iso, trata de romper todo tipo de prexuízos de xénero con respecto á súa actividade, tan ligada á rama informática. A igualdade entre homes e mulleres é unha das súas maiores preocupacións, e o seu ámbito de acción concrétase especialmente a través da Cátedra ALDABA- WIB ( Women, ICT & Business), constituída coas Universidades da Coruña e Vigo, cuxo principal obxectivo é fomentar a presenza da muller no desenvolvemento das TIC, dando visibilidade ás referentes femininas e impulsando iniciativas que animen a nenas e mozas a escoller carreiras relacionadas co ámbito das Novas Tecnoloxías.

Para máis información: