O luns 30 de setembro conclúe o prazo para inscribirse en Tech Angels Capital, o evento organizado polo Clúster TIC Galicia o 28 e 29 de outubro nas instalacións da Zona Franca de Vigo para conectar startups tecnolóxicas galegas con investidores interesados en impulsar o crecemento destas compañías.
O encontro, que conta coa colaboración da Amtega, o propio Consorcio, o Igape e Node Hub, está aberto a todas aquelas empresas emerxentes con base en Galicia enfocadas no desenvolvemento, implementación ou aplicación de solucións tecnolóxicas innovadoras. As organizacións interesadas en participar teñen que enviar unha solicitude a través deste formulario.
Tech Angels Capital tamén busca achegarse a investidores, business angels e fondos de capital risco, dispostos a colaborar cos proxectos presentados co obxectivo de transformar, mellorar e promover o crecemento das startups que os impulsan. Neste caso, as entidades que queiran participar poden contactar co Clúster TIC Galicia en info@clusterticgalicia.com ou no 881 939 651.
O obxectivo é incentivar a cooperación e o crecemento do ecosistema emprendedor galego de base tecnolóxica, facilitando o seu acceso a recursos clave, novas oportunidades de mercado e á financiación que necesitan para escalar.
Foro TIC
O programa estrutúrase en dúas xornadas. O primeiro día, os inversores e as startups poderán entrar en contacto dun xeito distendido, a través dun foro colaborativo onde se presentarán retos e propostas do panorama TIC local e internacional, así como de actividades gastronómicas e de ocio.
O segundo día celebraranse sesións pitching e encontros 1to1, deseñados para facilitar conexións estratéxicas e maximizar o valor de cada interacción, co obxectivo de crear sinerxías e establecer acordos de colaboración entre investidores e startups.
Análise das solicitudes
Un comité de expertos integrado por membros do Clúster TIC Galicia, a Amtega, o Igape e Node Hub será o encargado de analizar as solicitudes recibidas, seleccionando os proxectos máis prometedores, en base a criterios de innovación, viabilidade e potencial de crecemento. As startups escollidas recibirán asesoramento previo para presentar da forma máis efectiva a súa proposta no encontro.
Comentarios