Máis dunha decena de organismos de transformación dixital e financeiros procedentes de Latinoamérica e Estados Unidos visitaron Galicia do 10 ao 14 de marzo, no marco da misión comercial inversa organizada polo Clúster TIC Galicia, en colaboración co Igape, para posicionar á comunidade como referente no ecosistema tecnolóxico internacional.

Durante a súa estancia, as potenciais investidoras percorreron A Coruña, Santiago de Compostela e Vigo para coñecer de primeira man proxectos de innovación e avances en I+D tecnolóxico, tanto a nivel privado como na administración pública, co obxectivo de identificar puntos de aprendizaxe e boas prácticas que se poidan extrapolar ou replicar nos seus respectivos países.

Neste sentido, visitaron distintos espazos de innovación, como o Centro de Servizos Avanzados da Cidade das TIC, o CESGA, o GaiásTech, Gradiant ou o Centro Tecnolóxico de Automoción de Galicia (CTAG). Así mesmo, mantiveron 80 reunións B2B con empresas socias do Clúster TIC Galicia e startups, ademais de participar en actividades de networking.

Nos encontros coas asociadas participaron Altia, Emetel,  Cinfo, Councilbox, Imatia, Itelsis, Qaroní, Quobis, Sg Tech, Teimas, Torusware e Visual MS, que amosaron os seus produtos e servizos máis innovadores en áreas como a intelixencia artificial, a ciberseguridade, a dixitalización industrial ou o IoT, ámbitos de especial interese para os organismos convidados.

Delegación internacional

A delegación internacional estaba integrada pola empresa de telecomunicacións Totalplay (México), EMCALI (Colombia), que opera neste sector, entre outros, e o Grupo  Enerxía Bogotá (Colombia), que fornece enerxía eléctrica e gas natural en Colombia, Perú, Brasil e Guatemala.

Tamén estiveron presentes a Federación Colombiana de Software e Tecnoloxías (Fedesoft), con máis de 500 afiliados e 30 anos de traxectoria; e o viceministro de Innovación e Tecnoloxía do Ministerio de Innovación da  República Dominicana, Armando José Manzueta Pena.

No ámbito da transformación dixital, acudiron representantes do Órgano Xudicial de Panamá, a Autoridade Nacional para a Innovación  Gobernamental (AIG) de Panamá e a Autoridade da Canle de Panamá.

As entidades financeiras tamén foron protagonistas desta misión comercial coa asistencia da Caixa de Aforros de Panamá, o Banco Interamericano de Desenvolvemento (BID) de EE. UU., que ofrece apoio financeiro e técnico a gobernos nacionais e subnacionais, así como a outras entidades de América Latina e o Caribe, e ASOBANCARIA (Colombia), que agrupa ao sector financeiro colombiano.

Esta iniciativa permitiulles coñecer os avances tecnolóxicos máis destacados da nosa rexión, ademais de xerar sinerxías estratéxicas para abordar posibles vías de colaboración que contribúan a fortalecer a competitividade e a innovación do sector TIC de Galicia a nivel global.