Infonet, compañía de servizos e solucións tecnolóxicas, impulsora de cloud.gal, recibiu o premio á "Mellor Iniciativa Empresarial Consolidada", no marco da V edición dos premios PEL da Deputación da Coruña, galardóns cos que a institución provincial recoñece cada ano ás empresas, asociacións e agrupacións industriais que apostan polo desenvolvemento económico, a innovación e a xeración de emprego de calidade.

Rafa Villaverde, CEO da compañía, foi o encargado de recoller o galardón, dedicándollo a todo o seu equipo, nun evento celebrado no Teatro Jofre de Ferrol. Este recoñecemento pon de manifesto o bo facer de Infonet, valorando a súa traxectoria empresarial, a boa xestión, a excelencia e o grao de innovación da firma.

Así mesmo, valora a súa estratexia de responsabilidade social empresarial (RSE) e a achega á sustentabilidade dos seus produtos, así como o seu papel na xeración de emprego de calidade e o destacable labor que leva a cabo como motor de desenvolvemento económico. Neste sentido, cabe destacar que a súa división de negocio cloud.gal posiciónase xa como primeiro provedor 100% galego de cloud computing cando se cumpre menos dun ano desde o seu lanzamento.

21 anos de eficiencia e profesionalidade

Infonet suma máis de 21 anos sendo referente de eficiencia e profesionalidade no sector tecnolóxico, centrando os seus esforzos na innovación dentro do universo virtual e a nube co seu servizo cloud.gal. Este nace en novembro de 2021 con catro familias de solucións cloud e doce produtos dirixidos á construción de infraestrutura na nube e contornas adaptados, a monitorización de sistemas para a mellora de procesos, automatización, incremento de produtividade, solucións de ciberseguridade, a implantación de estratexias que axilicen a adaptación de novas realidades tecnolóxicas ao espazo empresarial e o modern workplace.

Centrada en ofrecer o mellor equipo IT e a tecnoloxía máis innovadora, cloud.gal está dirixida a deseñar, desenvolver, integrar e xestionar as contornas tecnolóxicas de nova xeración en infraestrutura e servizos cloud. Unha nube áxil, segura, integrada, flexible, a medida, cos datos “en casa”, sen cruzar o charco, con espazos adaptados ás necesidades de cada empresa e coa tecnoloxía de grandes corporacións ao alcance de compañías de calquera tamaño.

Desde a compañía outórganlle un lugar moi importante á proximidade e o traballo personalizado. Tratan a cada cliente como único, cunha implicación absoluta da súa staff team e cunha análise en profundidade das necesidades de cada empresa a medio e longo prazo. En definitiva, buscan que o seu traballo xere un impacto positivo nas contas de resultado dos seus clientes, xerar a máxima confianza e ofertar servizos transparentes.