DataSpartan, Egatel, Imatia, Indra, NTT Data, Sixtema e SREC Solutions participarán no Foro Tecnolóxico de Emprego, que terá lugar o 11 e 12 de marzo no campus de Vigo. O evento, organizado por alumnado das tres escolas de enxeñería da universidade (Escola Técnica Superior de Enxeñería Industrial, Escola Técnica Superior de Enxeñería de Telecomunicación e Escola Técnica Superior de Minas e Enxeñería), celebra este ano o seu 25 aniversario con récord de participación: 51 empresas en total. 

Ademais de ser unha oportunidade idónea para conectar estudantes con empresas do sector TIC, a cita albergará diferentes workshops e actividades como speed recruiting, un sistema de entrevistas rápidas para que as empresas poidan coñecer de maneira áxil aos diferentes candidatos. Tamén se recuperará o formato de mesa redonda con responsables de recursos humanos para discutir as necesidades actuais ao contratar recén graduados.

Workshops

Dataspartan, SREC Solutions e Indra protagonizarán tres dos workshops previstos no Foro Tecnolóxico de Emprego. O martes 11 de marzo, ás 9:30 h, DataSpartan "Texto a Coñecemento: Construíndo un Buscador Semántico con Procesamento de Linguaxe Natural (NLP)". Ese mesmo día, ás 18:00 h, SREC Solutions tratará a "estandarización de procesos de traballo coa intelixencia artificial". Pola súa banda, o mércores 13 de marzo, ás 17:00 h, Indra abordará a "Introdución práctica e aplicacións en RFSoC, un dos dispositivos máis avanzados en sistemas de radiofrecuencia (RF)". 

Resposta positiva

Na última edición deste encontro participaron ao redor de 1.200 estudantes e, dende a organización, estiman que aproximadamente o 90% das prácticas curriculares e extracurriculares proveñen do foro, o que destaca a relevancia deste foro dentro do panorama educativo actual. Esta resposta positiva reflicte o bo momento tanto do foro como do sector tecnolóxico.